दिल्लीतील आंदोलनाची धग लंडनपर्यंत; ध्रुव राठीचे मोठे आवाहन, महात्मा गांधींच्या पुतळ्यासमोर आंदोलनाची घोषणा

मुख्य निवडणूक आयुक्त ज्ञानेश कुमार यांच्या राजीनाम्याच्या मागणीवरून सुरू असलेल्या आंदोलनाला आता आंतरराष्ट्रीय स्तरावर पाठिंबा मिळवण्याचे प्रयत्न सुरू झाले आहेत. या पार्श्वभूमीवर यूट्यूबर ध्रुव राठी याने लंडनमध्ये आंदोलन करण्याची घोषणा केली असून, जगभरातील भारतीयांना एकत्र येण्याचे आवाहन केले आहे.

कॉकरोच जनता पार्टी (CJP) ज्ञानेश कुमार यांच्या विरोधात आक्रमक भूमिका घेत असून, ध्रुव राठीनेही या आंदोलनाला पाठिंबा दर्शवला आहे. १० ऑक्टोबर रोजी दिल्लीतील आंदोलनानंतर ध्रुव राठी लंडनला रवाना झाला. त्यापूर्वी ९ ऑक्टोबर रोजी तो जर्मनीहून भारतात दाखल झाला होता. त्यानंतर गुरुग्राम येथील निवासस्थानातून पोलिसांनी त्याला ताब्यात घेतल्याचे वृत्त समोर आले होते. मात्र, काही वेळातच त्याला सोडण्यात आले.

लंडनमध्ये पोहोचल्यानंतर ध्रुव राठीने सोशल मीडिया प्लॅटफॉर्म एक्सवर पोस्ट करत आंतरराष्ट्रीय स्तरावर आवाज उठवण्याची वेळ आल्याचे म्हटले. भारतातील लोकशाही आणि निवडणूक प्रक्रियेबाबत आपली भूमिका मांडताना त्याने परदेशात राहणाऱ्या भारतीयांना आंदोलनात सहभागी होण्याचे आवाहन केले.

ध्रुव राठी भारतात दाखल झाल्यानंतर त्याच्याभोवती विविध वाद निर्माण झाले. त्याच्या नागरिकत्वाबाबत प्रश्न उपस्थित करण्यात आले होते. त्यावर त्याने पासपोर्ट दाखवून स्पष्टीकरण दिले. तसेच, २०१८ मधील एका प्रकरणात न्यायालयाकडून समन्स जारी झाल्याचेही वृत्त आहे.

दरम्यान, भारतातील आंदोलनाचे पडसाद लंडनमध्येही उमटताना दिसत आहेत. भारतीय उच्चायुक्तालयासमोर NSUI समर्थकांनी आंदोलन केल्याचे सांगितले जात आहे. आता ध्रुव राठीने लंडनमधील पार्लमेंट स्क्वेअर येथे महात्मा गांधी यांच्या पुतळ्यासमोर आंदोलन करण्याची घोषणा केली आहे. या आंदोलनात जास्तीत जास्त लोकांनी सहभागी व्हावे, असे आवाहन त्याने केले आहे.

व्हिडीओच्या माध्यमातून ध्रुव राठीने परदेशात राहणाऱ्या भारतीयांनी एकत्र येऊन आपला आवाज बुलंद करण्याची गरज व्यक्त केली. मुख्य निवडणूक आयुक्त ज्ञानेश कुमार यांच्यावर त्याने गंभीर आरोप केले असून, आंदोलकांना ताब्यात घेतले जात असल्याचा दावाही केला आहे.

एकीकडे CJP च्या नेत्यांवरील पोलिसांच्या कारवाईची चर्चा सुरू असताना, दुसरीकडे ध्रुव राठीच्या लंडनमधील आंदोलनाच्या घोषणेमुळे या प्रकरणाला आंतरराष्ट्रीय स्तरावर किती प्रतिसाद मिळतो, याकडे सर्वांचे लक्ष लागले आहे.