पुणे: महिला पोलिस असल्याचे भासवून मिरवत होती रुबाब, तोतया ‘लेडी सिंघम’चा पर्दाफाश

Pune Crime News: अंगावर खाकी गणवेश, खांद्यावर स्टार आणि पोलिस अधिकाऱ्यांप्रमाणे रुबाब दाखवत नागरिकांमध्ये वावरणाऱ्या 25 वर्षीय तोतया ‘लेडी सिंघम’ला पुणे पोलिसांनी अटक केली आहे. लष्कर पोलीस ठाण्याच्या पथकाने शनिवारी (6 जून) कॅम्प परिसरात ही कारवाई करत संबंधित महिलेला ताब्यात घेतले.

अटक करण्यात आलेल्या महिलेची ओळख समिना आसिफ इनामदार उर्फ समिना अयुब पठाण (वय 25) अशी आहे. पोलिसांच्या माहितीनुसार, समिनाचे पोलीस दलात भरती होऊन अधिकारी बनण्याचे स्वप्न होते. मात्र, ते पूर्ण न झाल्याने ती खाकी वर्दी परिधान करून स्वतःला पोलिस अधिकारी असल्याचे भासवत होती. सध्या ती एका खासगी कंपनीत कार्यरत असल्याची माहिती तपासातून समोर आली आहे.

Pune Crime News: नेमकी घटना काय?

शनिवारी (6 जून) लष्कर पोलीस ठाण्याचे पोलीस उपनिरीक्षक महेश शिंदे आपल्या पथकासह कॅम्प परिसरात नियमित गस्त घालत होते. यावेळी एका प्रसिद्ध खासगी क्लिनिकबाहेर त्यांना पोलिसांच्या गणवेशात उभी असलेली एक महिला दिसली. तिच्या खांद्यावर पोलीस उपनिरीक्षक पदाचे स्टार्स देखील लावलेले होते.

मात्र, संबंधित महिलेच्या वागणुकीत आणि हालचालींमध्ये काही विसंगती आढळल्याने पीएसआय महेश शिंदे यांना संशय आला. तिची चौकशी केल्यानंतर अनेक बाबी संशयास्पद वाटू लागल्या. यानंतर अधिक सखोल पडताळणी करण्यात आली असता, ती महिला प्रत्यक्षात पोलिस दलातील नसून बनावट ओळख वापरत असल्याचे उघड झाले.

Pune Crime News: चौकशीत उघडकीस आले सत्य

महिलेच्या हालचाली संशयास्पद वाटल्याने पीएसआय महेश शिंदे यांनी महिला पोलीस कर्मचाऱ्यांच्या मदतीने तिची चौकशी सुरू केली. “तुमची नियुक्ती कोणत्या पोलीस ठाण्यात आहे?” तसेच “तुमचे अधिकृत ओळखपत्र दाखवा,” असे प्रश्न विचारल्यानंतर संबंधित महिला गोंधळून गेली.

चौकशीदरम्यान ती समाधानकारक उत्तरे देऊ शकली नाही आणि उडवाउडवीची भूमिका घेऊ लागली. त्यामुळे पोलिसांचा संशय अधिकच बळावला. अखेर तिला ताब्यात घेऊन सखोल चौकशी करण्यात आली. तपासादरम्यान ती प्रत्यक्षात पोलीस दलातील नसून बनावट ओळख वापरत असल्याचे स्पष्ट झाले. त्यानंतर पोलिसांनी तिच्याविरुद्ध आवश्यक ती कायदेशीर कारवाई सुरू केली.

Pune Crime News: पोलिसांची वर्दी परिधान करण्यामागील धक्कादायक कारण समोर

प्राथमिक चौकशीत आरोपी समिना इनामदार हिने पोलिसांचा गणवेश का परिधान केला होता, यामागील कारण उघड झाले आहे. मिळालेल्या माहितीनुसार, कॅम्प परिसरातील एका प्रसिद्ध क्लिनिकमध्ये उपचारासाठी डॉक्टरांची अपॉइंटमेंट मिळवण्यात तिला अडचणी येत होत्या. गर्दीमुळे तिला वेळ मिळत नसल्याने तिने वेगळाच मार्ग अवलंबल्याचे समोर आले.

लवकर अपॉइंटमेंट मिळावी आणि क्लिनिकमधील कर्मचाऱ्यांवर प्रभाव पडावा यासाठी तिने पोलिसांचा गणवेश परिधान केला. तसेच स्वतःला पोलीस अधिकारी असल्याचे भासवत रिसेप्शनिस्ट आणि इतर उपस्थितांवर दबाव टाकण्याचाही प्रयत्न केल्याची माहिती तपासात समोर आली आहे.

या प्रकरणी लष्कर पोलिसांनी समिना इनामदार हिच्याविरुद्ध गुन्हा दाखल करून तिला अटक केली आहे. याशिवाय, तिने यापूर्वीही अशाच प्रकारे पोलिसांची बनावट ओळख वापरून कोणाची फसवणूक केली आहे का, याचा सखोल तपास पोलिसांकडून सुरू आहे.