खाजगी भेट की राजकीय रणनीती? एकनाथ शिंदे पुन्हा दरे गावात; दोन दिवसांच्या वास्तव्यात काय घडणार?

सातारा: महाराष्ट्राचे उपमुख्यमंत्री एकनाथ शिंदे यांनी दिल्लीतील अधिकृत दौरा पूर्ण केल्यानंतर थेट सातारा जिल्ह्यातील महाबळेश्वर तालुक्यातील आपल्या मूळ गावी दरे येथे धाव घेतली आहे. त्यांच्या या अचानक दौऱ्यामुळे राजकीय वर्तुळात विविध चर्चांना सुरुवात झाली असून ते पुढील दोन दिवस गावात मुक्काम करणार आहेत.

माहितीनुसार, शिंदे हे खासगी कारणांसाठी दरे गावात आले असले तरी मुक्कामादरम्यान ते परिसरातील विविध विकासकामांचा आढावाही घेणार आहेत. बुधवारी मध्यरात्री सुमारे २.३० वाजता ते दरे येथील त्यांच्या निवासस्थानी पोहोचले. त्यांच्या आगमनानंतर स्थानिक प्रशासन आणि पक्ष कार्यकर्त्यांमध्ये चांगलीच हालचाल सुरू झाली आहे.

विशेष विमानाने पुणे, त्यानंतर रस्त्याने दरे गाठले

सूत्रांच्या माहितीनुसार, एकनाथ शिंदे यांनी दिल्लीतील नियोजित कार्यक्रम पूर्ण केल्यानंतर विशेष विमानाने पुण्याकडे प्रस्थान केले. पुणे विमानतळावर उतरल्यावर त्यांनी रस्तेमार्गे साताऱ्यातील दरे गावाकडे प्रवास केला. रात्री उशिरा ते आपल्या निवासस्थानी दाखल झाले.

दोन दिवस विकासकामांचा आढावा

दरे गावातील मुक्कामादरम्यान शिंदे विविध विकास प्रकल्प, स्थानिक सुविधा आणि प्रलंबित कामांची पाहणी करणार असल्याची माहिती प्रशासनाकडून मिळाली आहे. त्यांच्या या दौऱ्यामुळे स्थानिक पातळीवर उत्सुकता निर्माण झाली असून राजकीय घडामोडींनाही वेग येण्याची शक्यता व्यक्त केली जात आहे.

अचानक दौऱ्यामुळे चर्चांना उधाण

दिल्लीतील बैठका पूर्ण होताच शिंदे यांनी कोणतीही पूर्वसूचना न देता थेट दरे गाव गाठल्याने त्यांच्या दौऱ्याबाबत अनेक तर्क-वितर्क लावले जात आहेत. हा केवळ खाजगी दौरा आहे की आगामी राजकीय घडामोडींशी संबंधित काही महत्त्वाच्या चर्चांचा भाग आहे, याकडे सर्वांचे लक्ष लागले आहे.