शरद पवारांचा मोठा निर्णय; अभिजीत दीपकेंना थेट जबाबदारी, उद्याच्या मोर्चापूर्वी राजकीय घडामोडींना वेग

अभिजीत दीपके यांच्या जेलभरो आंदोलनाला शरद पवार गटाचा पाठिंबा; ठाकरे बंधूही मैदानात

निवडणूक आयोगातील कथित घोटाळ्याच्या निषेधार्थ कॉकरोच जनता पार्टीचे नेते अभिजीत दीपके यांनी मुंबईत जेलभरो आंदोलनाची घोषणा केली आहे. 2 ऑक्टोबर रोजी दादर येथील शिवाजी पार्कमध्ये हे आंदोलन होणार असून, राज्यासह देशभरातून कार्यकर्ते सहभागी होण्याची शक्यता व्यक्त केली जात आहे.

या आंदोलनाच्या पार्श्वभूमीवर राष्ट्रवादी काँग्रेसचे अध्यक्ष शरद पवार यांच्या गटाने महत्त्वाची भूमिका घेतली आहे. खासदार सुप्रिया सुळे यांनी माध्यमांशी संवाद साधताना अभिजीत दीपके यांच्या आंदोलनाला पक्षाचा पाठिंबा असल्याचे स्पष्ट केले. त्यामुळे या आंदोलनाला राजकीय पाठबळ मिळाल्याचे चित्र आहे.

सुप्रिया सुळे म्हणाल्या की, 2 ऑक्टोबर रोजी अभिजीत दीपके यांच्या नेतृत्वाखाली मुंबईत जेलभरो आंदोलन होणार आहे. या आंदोलनाला आमचा पाठिंबा आहे. तसेच 4 ऑक्टोबर रोजी होणाऱ्या ठाकरे बंधूंच्या मोर्चालाही राष्ट्रवादी काँग्रेसचा पाठिंबा असेल, असे त्यांनी स्पष्ट केले.

मात्र, शरद पवार किंवा राष्ट्रवादी काँग्रेसचे नेते या आंदोलनांमध्ये प्रत्यक्ष सहभागी होणार का, याबाबत अद्याप स्पष्टता नाही. त्यामुळे शरद पवार या मोर्चात सहभागी होणार का, याकडे राजकीय वर्तुळाचे लक्ष लागले आहे.

ठाकरे बंधूंचाही पाठिंबा

अभिजीत दीपके यांच्या आंदोलनाला उद्धव ठाकरे आणि राज ठाकरे यांनीही पाठिंबा दर्शवला आहे. पत्रकार परिषदेत उद्धव ठाकरे यांनी दीपके यांनी यापूर्वी दिल्लीत जंतरमंतर येथे केलेल्या आंदोलनाचाही उल्लेख केला. मुंबईतील आंदोलनालाही आमचा पाठिंबा असून आम्ही त्यांच्यासोबत आहोत, असे त्यांनी सांगितले.

तर राज ठाकरे यांनी लोकशाहीच्या रक्षणासाठी आंदोलन आणि मोर्चांच्या माध्यमातून नागरिकांनी पुढे यावे, असे मत व्यक्त केले. लोकशाहीसाठी पुढे येणाऱ्या प्रत्येकाला आपला पाठिंबा असल्याचे त्यांनी सांगितले.

शिवाजी पार्कमध्ये जेलभरो आंदोलन

कॉकरोच जनता पार्टीकडून 2 ऑक्टोबर रोजी दादरच्या शिवाजी पार्कमध्ये जेलभरो आंदोलनाचे आयोजन करण्यात आले आहे. या आंदोलनात मोठ्या संख्येने तरुण आणि कार्यकर्ते सहभागी होण्याची शक्यता आहे. अभिजीत दीपके स्वतः या आंदोलनाचे नेतृत्व करणार आहेत.

आंदोलनाच्या पार्श्वभूमीवर शिवाजी पार्क परिसरात पोलिसांचा मोठा बंदोबस्त ठेवण्यात येण्याची शक्यता आहे. कायदा आणि सुव्यवस्था अबाधित राहावी यासाठी प्रशासनाकडून आवश्यक खबरदारी घेतली जात आहे.