पुणे पदवीधर-शिक्षक निवडणुकीवरून महायुतीत मतभेद? उदय सामंत आज एकनाथ शिंदेंची भेट घेणार

राज्यात पदवीधर आणि शिक्षक मतदारसंघांच्या निवडणुकांच्या पार्श्वभूमीवर राजकीय घडामोडींना वेग आला आहे. महाविकास आघाडी आणि महायुतीकडून निवडणुकीसाठी जोरदार तयारी सुरू असतानाच, महायुतीतील समन्वयाचा मुद्दा चर्चेत आला आहे. पुणे पदवीधर आणि शिक्षक मतदारसंघाच्या जागा भाजपला देण्यात आल्याने शिंदेंच्या शिवसेनेतील काही पदाधिकारी नाराज असल्याची चर्चा आहे.

पुणे शिक्षक मतदारसंघातून अपक्ष उमेदवार सचिन सानप यांना पाठिंबा देण्याची मागणी शिंदे गटातील काही पदाधिकाऱ्यांकडून होत असल्याचे सांगितले जात आहे. त्यामुळे शिवसेना नेमकी कोणती भूमिका घेणार, याकडे राजकीय वर्तुळाचे लक्ष लागले आहे.

उदय सामंत घेणार एकनाथ शिंदेंची भेट

पुण्यातील निवडणुकीची जबाबदारी शिवसेनेकडून मंत्री उदय सामंत यांच्याकडे सोपवण्यात आली आहे. या पार्श्वभूमीवर उदय सामंत आज सकाळी ११.३० वाजता उपमुख्यमंत्री एकनाथ शिंदे यांची भेट घेणार असल्याची माहिती आहे. या भेटीत अपक्ष उमेदवार सचिन सानप यांना पाठिंबा देण्याच्या मुद्द्यावर चर्चा होण्याची शक्यता आहे.

यापूर्वी शिंदे गटातील काही पदाधिकाऱ्यांनी एकनाथ शिंदे यांची भेट घेतली होती. त्यावेळी त्यांनी पदाधिकाऱ्यांना युतीधर्म पाळण्याच्या सूचना दिल्याचे सांगितले जाते. मात्र, सचिन सानप यांना पाठिंबा देण्याची मागणी कायम असल्याने शिवसेनेच्या अंतिम निर्णयाकडे सर्वांचे लक्ष लागले आहे.

शिक्षक आणि पदवीधर मतदारसंघांच्या निवडणुकांमध्ये भाजप, शिवसेना आणि राष्ट्रवादी काँग्रेस यांच्यात पुरेसा समन्वय नसल्याची चर्चा राजकीय वर्तुळात सुरू आहे. त्यामुळे उदय सामंत आणि एकनाथ शिंदे यांच्या भेटीनंतर या प्रकरणात काय निर्णय होतो, हे पाहणे महत्त्वाचे ठरणार आहे.

सचिन सानप यांनी काय केले होते आवाहन?

अपक्ष उमेदवार सचिन सानप यांनी सर्व राजकीय पक्षांना आपल्याला पाठिंबा देण्याचे आवाहन केले होते. त्यांनी एकनाथ शिंदे यांच्याकडेही पाठिंब्याची विनंती केली आहे.

सानप यांच्या मते, शिक्षक मतदारसंघातून निवडून येणारा आमदार हा शिक्षकांच्या प्रश्नांची जाण असलेला आणि त्यांच्या समस्या समजून घेणारा असावा. शिक्षकांचे प्रश्न प्रभावीपणे मांडता यावेत, या भूमिकेतून आपण अपक्ष म्हणून निवडणूक लढवत असल्याचे त्यांनी स्पष्ट केले.

तसेच, एकनाथ शिंदे आपल्या विनंतीचा सकारात्मक विचार करतील, अशी अपेक्षा त्यांनी व्यक्त केली होती. सध्या विविध शिक्षक आणि प्राध्यापक संघटनांकडून आपल्या उमेदवारीसाठी तयारी सुरू असल्याचेही सानप यांनी सांगितले.

आता सचिन सानप यांना शिंदेंची शिवसेना पाठिंबा देणार की महायुतीच्या भूमिकेनुसार निर्णय घेणार, याबाबत उत्सुकता निर्माण झाली आहे.