मुंबईतील आंदोलनानंतर अभिजीत दिपके आणि सीजेपीच्या अडचणी वाढल्या; वकिलांनी घेतला मोठा निर्णय

अभिजीत दिपके यांच्या कॉकरोच जनता पार्टीचे मुंबईतील शिवाजी पार्कात मोठे आंदोलन पार पडले. या आंदोलनासाठी मोठ्या संख्येने लोक उपस्थित होते. मात्र, या आंदोलनाला पोलिसांची परवानगी नसल्याचे समोर आले आहे. आंदोलनानंतर आता अभिजीत दिपके आणि सीजेपीच्या अडचणी वाढण्याची शक्यता निर्माण झाली आहे.

मुख्य निवडणूक आयुक्त ज्ञानेश कुमार यांच्या राजीनाम्याची मागणी करत कॉकरोच जनता पार्टीने काल मुंबईतील शिवाजी पार्कात आंदोलन केले. या आंदोलनाला मोठा प्रतिसाद मिळाल्याचा दावा करण्यात आला असून, मोठ्या संख्येने नागरिक शिवाजी पार्कात जमले होते. काही बॉलिवूड कलाकारांनीही या आंदोलनात सहभाग घेतल्याचे सांगितले जात आहे.

दरम्यान, शिवाजी पार्कातील या आंदोलनाला पोलिसांनी परवानगी नाकारली होती. तरीही सीजेपीकडून आंदोलन करण्यात आले. आंदोलनादरम्यान मोठी गर्दी झाली आणि त्यानंतर परिसरात काही काळ गोंधळाचे वातावरण निर्माण झाले. स्थानिक नागरिकांनीही या आंदोलनाला विरोध केल्याचे समोर आले.

या पार्श्वभूमीवर आता अभिजीत दिपके यांच्यासह सीजेपीच्या नेत्यांच्या अडचणी वाढताना दिसत आहेत. सिद्धी देवलेकर नावाच्या वकिलांनी अभिजीत दिपके आणि सीजेपीच्या नेत्यांविरोधात पोलिसांकडे तक्रार दाखल केली आहे. त्यांच्या तक्रारीनुसार, सीजेपीला आंदोलनासाठी परवानगी देण्यात आलेली नव्हती आणि तरीही मोठ्या संख्येने लोक एकत्र करून आंदोलन करण्यात आले.

तक्रारीत शिवाजी पार्क परिसरातील आंदोलनासंदर्भातील न्यायालयीन निर्देशांचाही उल्लेख करण्यात आला आहे. परवानगीशिवाय आंदोलन केल्यामुळे शांतता भंग होण्याची शक्यता निर्माण झाली तसेच स्थानिक नागरिकांना त्रास झाल्याचा दावा तक्रारीत करण्यात आला आहे.

आंदोलन करण्याचा अधिकार प्रत्येकाला आहे, मात्र त्यासाठी योग्य ठिकाण आणि आवश्यक परवानगी घेणे गरजेचे असल्याचे सिद्धी देवलेकर यांनी म्हटले आहे. मुख्य निवडणूक आयुक्तांच्या राजीनाम्याची मागणी असल्यास दिल्लीतील जंतर-मंतरसारख्या ठिकाणी आंदोलन करता आले असते, असेही त्यांनी नमूद केले.

या प्रकरणात मुंबई पोलिसांनी तक्रारीची दखल घेतल्याबद्दल सिद्धी देवलेकर यांनी पोलिसांचे आभार मानले. तसेच या प्रकारामुळे सर्वसामान्य नागरिकांना त्रास झाल्याचे सांगत परिसरातील सुरक्षेबाबतही त्यांनी चिंता व्यक्त केली.

दरम्यान, अभिजीत दिपके यांनी मुख्य निवडणूक आयुक्त ज्ञानेश कुमार यांनी राजीनामा द्यावा, अशी मागणी पुन्हा केली आहे. राजीनामा न दिल्यास 10 ऑक्टोबर रोजी दिल्लीत जाऊन आंदोलन करण्याचा इशाराही त्यांनी दिला आहे. शिवाजी पार्कातील आंदोलनादरम्यान त्यांनी सरकारवर जोरदार टीका केली.