ठाकरे गटाचा मोठा निर्णय! दुपारी 3 वाजता नेमकं काय घडणार? राजकीय वर्तुळात खळबळ!

शिंदे गटाच्या इशाऱ्यानंतरही ठाकरे गट ठाम; दुपारी 3 वाजता ठाण्यात आंदोलन

ठाण्यातील राजकीय वातावरण चांगलेच तापले आहे. शिंदे गटाकडून देण्यात आलेल्या इशाऱ्यानंतरही ठाकरे गटाने आंदोलनावर ठाम राहण्याचा निर्णय घेतला आहे. खासदार नरेश म्हस्के यांच्या वक्तव्यानंतर ठाकरे गट आज दुपारी 3 वाजता ठाण्यात दाखल होणार असल्याचे सांगण्यात आले आहे. पूर्णेकर हत्या प्रकरणावरून संजय राऊत यांनी सत्ताधाऱ्यांवर गंभीर आरोप करत गृहमंत्र्यांच्या राजीनाम्याची मागणी केली आहे.

ठाण्यात येऊन आमच्या विरोधात अपशब्द वापरल्यास संबंधित व्यक्ती ठाण्यातून परत जाणार नाही, असा इशारा शिंदे गटाचे खासदार नरेश म्हस्के यांनी ठाकरे गटाला दिला होता. आजच्या आंदोलनाच्या पार्श्वभूमीवर त्यांनी हे वक्तव्य केले होते. मात्र, या इशाऱ्यानंतरही ठाकरे गटाने आंदोलन मागे न घेता ठाण्यात जाण्याचा निर्धार व्यक्त केला आहे.

“ठाणे कुणाच्या बापाची जहागीर नाही. आम्ही दुपारी 3 वाजता ठाण्यात येत आहोत,” असे आव्हान ठाकरे गटाकडून देण्यात आले आहे. त्यामुळे आज ठाण्यात नेमक्या काय घडामोडी घडतात, याकडे राजकीय वर्तुळाचे लक्ष लागले आहे.

संजय राऊतांचे थेट आव्हान

ठाकरे गटाचे नेते संजय राऊत यांनीही शिंदे गटाला प्रत्युत्तर दिले आहे. “आम्ही आज दुपारी 3 वाजता ठाण्यात जात आहोत. ठाणे कुणाच्या बापाची जहागीर नाही. पूर्णेकर यांच्या हत्येमागे कोणाचा हात आहे, असा प्रश्न विचारणे म्हणजे एखाद्या नेत्याची बदनामी कशी होऊ शकते? आमचे प्रश्न तुम्हाला का टोचत आहेत?” असा सवाल राऊत यांनी उपस्थित केला.

ज्या कुटुंबाने आपली जवळची व्यक्ती गमावली आहे आणि ते न्यायाची मागणी करत आहेत, त्यांच्या पाठीशी उभे राहणे आवश्यक असल्याचेही राऊत म्हणाले.

गृहमंत्र्यांच्या राजीनाम्याची मागणी

सत्ताधारी पक्षातील लोकांकडून विरोधकांना अशा प्रकारच्या धमक्या दिल्या जात असतील, तर राज्याच्या गृहमंत्र्यांनी राजीनामा द्यावा आणि पोलीस आयुक्तांनाही बदलण्यात यावे, अशी मागणी संजय राऊत यांनी केली.

विरोधी पक्षातील खासदार आणि आमदारांना धमक्या देणे योग्य नसल्याचे सांगत त्यांनी सत्ताधाऱ्यांवर जोरदार टीका केली. पूर्णेकर यांच्या कुटुंबाला न्याय मिळावा, हीच आमची मागणी असल्याचे राऊत यांनी स्पष्ट केले.

यावेळी राऊत यांनी माजी महापौर मीनाक्षी शिंदे आणि त्यांच्या पतीबाबतही गंभीर आरोप केले. या प्रकरणातील आरोपींशी त्यांचा संबंध काय होता आणि पोलिसांकडून कारवाई का केली जात नाही, असे प्रश्न त्यांनी उपस्थित केले. पोलिसांवर कोणाचा दबाव आहे, याचीही चौकशी झाली पाहिजे, अशी भूमिका त्यांनी मांडली.

“धमक्यांना घाबरणार नाही”

सत्ताधारी पक्षाने गुंडगिरीचा मार्ग स्वीकारला तर त्याची जबाबदारी पोलीस आयुक्त, गृहमंत्री आणि पालकमंत्र्यांची असेल, असेही राऊत म्हणाले. पोलिसांचे संरक्षण असल्यामुळे काही जण धमकीची भाषा करत असल्याचा आरोप त्यांनी केला.

“आम्ही अशा अनेक धमक्या पाहिल्या आहेत. आम्ही त्यांना घाबरणार नाही. हिंमत असेल तर समोर या,” अशा शब्दांत राऊत यांनी शिंदे गटाला आव्हान दिले.

ठाकरे आणि शिंदे गटामधील आरोप-प्रत्यारोप तीव्र झाल्यामुळे आज दुपारी 3 वाजता ठाण्यात होणाऱ्या आंदोलनाकडे सर्वांचे लक्ष लागले आहे.