तुकाराम मुंढे नंबर 1! मुख्यमंत्र्यांसह उपमुख्यमंत्र्यांनाही टाकलं मागे, नेमकं काय घडलं?

तुकाराम मुंढेंची सोशल मीडियावरही हवा; फॉलोअर्सपासून एंगेजमेंटपर्यंत मुख्यमंत्र्यांसह उपमुख्यमंत्र्यांना टाकलं मागे!

महाराष्ट्रातील कडक आणि शिस्तप्रिय अधिकारी म्हणून तुकाराम मुंढे यांची ओळख आहे. आपल्या कामाच्या वेगळ्या शैलीमुळे ते नेहमीच चर्चेत असतात. मात्र, आता त्यांच्या प्रशासकीय कामासोबतच सोशल मीडियावरील लोकप्रियतेचीही जोरदार चर्चा सुरू झाली आहे.

इन्स्टाग्राम आणि ‘X’ (ट्विटर) वरील त्यांच्या फॉलोअर्सची संख्या, पोस्ट्सना मिळणारा प्रतिसाद आणि एंगेजमेंट रेट पाहता तुकाराम मुंढे यांचा डिजिटल प्रभाव किती मोठा आहे, हे स्पष्ट होत आहे. विशेष म्हणजे, या आकडेवारीत ते मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यापेक्षाही पुढे असल्याचा दावा केला जात आहे.

इन्स्टाग्रामवर तुकाराम मुंढे ‘नंबर वन’?

उपलब्ध इन्स्टाग्राम आकडेवारीनुसार, तुकाराम मुंढे यांचे सुमारे ३४ लाख १५ हजार फॉलोअर्स आहेत. मुख्यमंत्री देवेंद्र फडणवीस यांचे सुमारे २९ लाख २ हजार, तर उपमुख्यमंत्री एकनाथ शिंदे यांचे १३ लाख १ हजार फॉलोअर्स आहेत.

मागील ६० दिवसांतील पोस्ट्सचा विचार केला तर मुंढे यांनी तुलनेने कमी म्हणजे १३ पोस्ट्स केल्या. याच कालावधीत फडणवीस यांच्या ९७, तर एकनाथ शिंदे यांच्या २५ पोस्ट्स असल्याचे आकडे सांगतात.

मात्र, खरी लक्षवेधी बाब म्हणजे एंगेजमेंट रेट.

• तुकाराम मुंढे – २०.३५%
• देवेंद्र फडणवीस – ०.५०%
• एकनाथ शिंदे – ०.२४%

म्हणजेच, पोस्ट्सची संख्या कमी असतानाही मुंढे यांच्या कंटेंटला मिळणारा प्रतिसाद तुलनेने मोठा असल्याचे या आकडेवारीतून दिसून येते.

‘X’ वरही मुंढेंच्या पोस्टना मोठा प्रतिसाद

‘X’ प्लॅटफॉर्मवरील फॉलोअर्समध्ये मात्र राजकीय नेते आघाडीवर आहेत. देवेंद्र फडणवीस यांचे सुमारे ५.०२ लाख, एकनाथ शिंदे यांचे ३.८७ लाख, तर तुकाराम मुंढे यांचे २.६५ लाख फॉलोअर्स आहेत.

पण एंगेजमेंट रेटमध्ये चित्र वेगळे आहे.

• तुकाराम मुंढे – ४.६२%
• देवेंद्र फडणवीस – ०.०७%
• एकनाथ शिंदे – ०.०४%

त्यामुळे फॉलोअर्सची संख्या आणि प्रत्यक्ष मिळणारा प्रतिसाद यामध्ये मोठा फरक असल्याचे दिसून येते.

अधिकाऱ्यांमध्येही मुंढेंची आघाडी

सोशल मीडिया लोकप्रियतेच्या बाबतीत इतर चर्चेतील अधिकाऱ्यांशी तुलना केली तरी तुकाराम मुंढे पुढे असल्याचे आकडे दर्शवतात.

इन्स्टाग्राम फॉलोअर्सच्या बाबतीत:

• तुकाराम मुंढे – ३४.१५ लाख
• समीर वानखेडे – ८.४७ लाख
• विश्वास नांगरे पाटील – ६.१२ लाख

तर एंगेजमेंट रेटमध्ये:

• तुकाराम मुंढे – २०.३५%
• विश्वास नांगरे पाटील – ३.६०%
• समीर वानखेडे – ३.२०%

कमी पोस्ट्स, पण मोठा डिजिटल प्रभाव

तुकाराम मुंढे यांच्या सोशल मीडिया लोकप्रियतेमागे त्यांची कामाची प्रतिमा आणि नागरिकांशी जोडले जाण्याची पद्धत महत्त्वाची ठरत असल्याचे दिसते. त्यांच्या कामावर अनेकजण रिल्स आणि व्हिडीओ तयार करून सोशल मीडियावर शेअर करत आहेत. त्यांच्या फोटो आणि व्हिडीओंवर मोठ्या प्रमाणात लाईक्स, कमेंट्स आणि प्रतिक्रिया पाहायला मिळत आहेत.

विशेषतः अन्न व औषध प्रशासनाच्या आयुक्तपदाची जबाबदारी स्वीकारल्यानंतर त्यांच्या कामाकडे पुन्हा एकदा सर्वांचे लक्ष वेधले गेले आहे.

तुकाराम मुंढेंचे अधिकृत व्हेरिफाइड फेसबुक पेज उपलब्ध नसल्याने फेसबुकवरील आकडेवारीची थेट तुलना करता येत नाही. मात्र, उपलब्ध इन्स्टाग्राम आणि ‘X’च्या आकडेवारीतून फॉलोअर्सपेक्षा त्यांना मिळणारा प्रत्यक्ष प्रतिसाद अधिक चर्चेचा विषय ठरत आहे.

आज सोशल मीडिया हा केवळ मनोरंजनाचे माध्यम राहिलेला नाही. प्रशासन, आरोग्य, शिक्षण, अन्न-औषध सुरक्षा आणि नागरिकांशी संबंधित विविध विषयांवर माहिती देण्यासाठीही त्याचा प्रभावी वापर होत आहे. त्यामुळे एखाद्या अधिकाऱ्याचे फॉलोअर्स किती आहेत, यापेक्षा त्याच्या कामाला नागरिकांकडून किती प्रतिसाद मिळतो, हे अधिक महत्त्वाचे ठरते.

आणि याच बाबतीत सध्या तुकाराम मुंढेंचा सोशल मीडिया प्रभाव चांगलाच चर्चेत आला आहे.