Rain Alert : राज्यात पावसाचा कहर; रेड अलर्ट जारी, नद्यांना पूर, नागरिकांना घरातच राहण्याचं आवाहन

भारतीय हवामान विभागाने जळगाव जिल्ह्यासाठी रेड अलर्ट जारी केला असून सलग दुसऱ्या दिवशीही जिल्ह्यात मुसळधार पावसाची संततधार सुरू आहे. वाशिम जिल्ह्यात रात्रभर झालेल्या जोरदार पावसामुळे पैनगंगा नदीला पूर आला असून नदी दुथडी भरून वाहत आहे. नदीकाठच्या भागांतील पाण्याची पातळी झपाट्याने वाढली असून अनेक लहान-मोठे नाले आणि ओढेही तुडुंब भरले आहेत.

दरम्यान, जळगावमधील हतनूर धरणाचे 36 दरवाजे उघडण्यात आले असून सुमारे 78 हजार क्यूसेक वेगाने पाण्याचा विसर्ग सुरू आहे. सातपुडा पर्वतरांगांमध्ये मुसळधार पावसामुळे मनुदेवी धबधबा प्रवाहित झाला असून मुक्ताईनगर, भुसावळ, रावेर आणि यावल परिसरातील अनेक नदी-नाल्यांना पूर आला आहे. मुक्ताईनगरजवळील कुंड धरण भरले असून कुर्हा-काकोडा परिसरातील नदीही दुथडी भरून वाहत आहे. या पार्श्वभूमीवर जिल्हा प्रशासनाने नागरिकांना नदीकाठच्या भागात जाणे टाळण्याचे आवाहन केले आहे.

सोलापूर जिल्ह्यातही पावसाचा परिणाम तीव्र जाणवत आहे. भीमा नदीतील पाण्याचा प्रवाह वाढल्यामुळे दक्षिण सोलापूर तालुक्यातील चिंचपूर बंधारा पाण्याखाली गेला असून महाराष्ट्र–कर्नाटक राज्यांमधील संपर्क तात्पुरता खंडित झाला आहे. बंधाऱ्यावरील वाहतूक पूर्णपणे बंद करण्यात आली असून कोणतीही अनुचित घटना घडू नये म्हणून प्रशासन सतर्क आहे. दुसरीकडे, पुणे जिल्ह्यातील मुसळधार पावसामुळे उजनी धरण ओव्हरफ्लो झाले असून धरणातून पाण्याचा विसर्ग सुरू करण्यात आला आहे. नागरिकांनी प्रशासनाच्या सूचनांचे पालन करून आवश्यक ती खबरदारी घ्यावी, असे आवाहन करण्यात आले आहे.