जगदंबाची शपथ घेऊन सांगते… अजितदादांना प्रदेशाध्यक्ष बदलायचा होता; रुपाली ठोंबरेंचा मोठा दावा

राष्ट्रवादी काँग्रेसमध्ये प्रदेशाध्यक्ष बदलण्याच्या मुद्द्यावरून राजकीय वातावरण तापलं आहे. पक्षाच्या नेत्या रुपाली पाटील ठोंबरे यांनी मोठा दावा करत प्रदेशाध्यक्ष बदलण्याची इच्छा ही दिवंगत अजित पवारांचीच होती, असं म्हटलं आहे. “जगदंबेची शपथ घेऊन सांगते, दादांनी प्रदेशाध्यक्ष बदलणार असल्याचं मला सांगितलं होतं,” असा दावा ठोंबरे यांनी केला. दरम्यान, राजकीय रणनीतीकार प्रशांत किशोर यांनीही सुनेत्रा पवारांना प्रदेशाध्यक्ष बदलण्याचा सल्ला दिल्याचं सांगितलं जात आहे. त्यामुळे राष्ट्रवादी काँग्रेसमध्ये प्रदेशाध्यक्ष बदलाच्या चर्चेला पुन्हा वेग आला आहे.

राष्ट्रवादी काँग्रेसमध्ये प्रदेशाध्यक्ष बदलण्याची मागणी आता अधिक जोर धरताना दिसत आहे. पक्षाच्या नेत्या रुपाली पाटील ठोंबरे यांनी टीव्ही9 मराठीशी बोलताना यासंदर्भात अनेक दावे केले आहेत. त्यांच्या म्हणण्यानुसार, अजित पवार यांच्या मनात प्रदेशाध्यक्ष बदलण्याचा निर्णय आधीपासूनच होता.

ठोंबरे यांनी सांगितलं की, पुणे महापालिका निवडणुकीच्या पार्श्वभूमीवर 15 नोव्हेंबरला अजित पवार यांच्यासोबत त्यांची भेट झाली होती. त्या भेटीत अजितदादांनी प्रदेशाध्यक्ष बदलणार असल्याचं सांगितलं होतं. “तुम्ही कामाला लागा. आपल्याला पुणे महापालिका निवडणूक जोमाने लढायची आणि जिंकायची आहे,” असं अजित पवारांनी सांगितल्याचा दावा त्यांनी केला.

“प्रदेशाध्यक्ष बदलणार असल्याचं दादांनी सांगितलं होतं”

रुपाली ठोंबरे यांच्या दाव्यानुसार, अजित पवार यांनी केवळ त्यांच्याशीच नव्हे, तर इतर कार्यकर्ते आणि पदाधिकाऱ्यांशीही याबाबत चर्चा केली होती. सुनील तटकरे यांना प्रदेशाध्यक्षपदावर दोन-तीन वर्षे झाली आहेत. त्यामुळे आता नव्या चेहऱ्यांना संधी देऊन पक्ष संघटन मजबूत करण्याची गरज असल्याचं ठोंबरे यांनी म्हटलं.

“जगदंबेची शपथ घेऊन सांगते, दादांनी मला सांगितलं होतं की मी प्रदेशाध्यक्ष बदलणार आहे. तुम्ही कामाला लागा,” असा दावा त्यांनी केला.

अजित पवारांच्या निर्णयाची अंमलबजावणी थांबली?

अजित पवार यांच्या काळात काही महत्त्वाचे निर्णय घेण्यात आले होते आणि त्यांची अंमलबजावणी होणार होती, असा दावा रुपाली ठोंबरे यांनी केला. अजित पवार पदाधिकारी आणि कार्यकर्त्यांशी संवाद साधून पक्ष संघटनेबाबत निर्णय घेत होते. मात्र, त्यांचं निधन झाल्यानंतर सुनेत्रा पवार यांच्यावर पक्षाची जबाबदारी आली आणि यापूर्वी ठरवलेल्या काही गोष्टी थांबल्या, असं त्या म्हणाल्या.

प्रदेशाध्यक्ष बदलण्याचा निर्णय आता सुनेत्रा पवार यांच्याच हातात असल्याचंही त्यांनी स्पष्ट केलं. पक्षाची संघटनात्मक ताकद वाढवण्यासाठी आणि अजित पवारांचं स्वप्न पूर्ण करण्यासाठी प्रदेशाध्यक्ष बदलण्याची आवश्यकता असल्याचं ठोंबरे यांनी सांगितलं.

“अजितदादांनी सांगूनही कार्यकर्त्यांना पत्र दिलं जात नव्हतं”

प्रदेशाध्यक्षांच्या कामकाजावरही रुपाली ठोंबरे यांनी प्रश्न उपस्थित केले. अजित पवार यांनी कार्यकर्त्यांच्या नियुक्त्या केल्यानंतर त्यांना अधिकृत पत्र देण्याच्या सूचना दिल्या होत्या. मात्र, त्याची अंमलबजावणी वेळेत झाली नाही, असा दावा त्यांनी केला.

अजित पवार यांनी सूचना देऊनही कार्यकर्त्यांना नियुक्तीची पत्रं देण्यात दिरंगाई केली जात असल्याचं त्यांनी म्हटलं. त्यामुळे कार्यकर्त्यांमध्ये नाराजी निर्माण होत असल्याचाही दावा त्यांनी केला.

“आमचं सुनील तटकरे यांच्याशी भांडण नाही किंवा वैयक्तिक वादही नाही. पण पक्ष मजबूत करण्यासाठी त्यांनी पुढे यावं आणि प्रदेशाध्यक्षपद सोडावं,” असं रुपाली ठोंबरे यांनी म्हटलं.

सुनील तटकरे आणि प्रफुल्ल पटेलांवरही निशाणा

यावेळी रुपाली ठोंबरे यांनी सुनील तटकरे आणि प्रफुल्ल पटेल यांच्या भूमिकेवरही प्रश्न उपस्थित केले. उमेश पाटील यांनी केलेल्या पोस्टवर प्रतिक्रिया देताना ठोंबरे म्हणाल्या की, त्या पोस्टमध्ये पक्षातील वास्तव परिस्थिती मांडण्यात आली आहे.

अजित पवार यांच्या राजकीय प्रवासात काही ज्येष्ठ नेते अपेक्षित ताकदीने त्यांच्या सोबत उभे राहिले नाहीत, असा दावा त्यांनी केला. अजित पवार यांच्या निधनानंतर सुनेत्रा पवार यांच्यावर जबाबदारी आली असतानाही त्यांना अपेक्षित पाठिंबा आणि ताकद दिली जात नसल्याचं त्यांनी म्हटलं.

विशेषतः सुनील तटकरे आणि प्रफुल्ल पटेल यांनी सुनेत्रा पवार यांच्या पाठीशी ठामपणे उभं राहायला हवं होतं, असं रुपाली ठोंबरे यांनी सांगितलं.

“सुनेत्रा पवारांच्या पाठी बंधू म्हणून उभं राहायला हवं होतं”

रुपाली ठोंबरे यांनी आपल्या वक्तव्याबाबत स्पष्टीकरण देताना आपण कोणावर वैयक्तिक आरोप करत नसल्याचं सांगितलं. आपण केवळ पक्षातील परिस्थिती मांडत असल्याचं त्या म्हणाल्या.

“सुनेत्रा पवारांच्या पाठी बंधू म्हणून उभं राहायला पाहिजे होतं, पण तसं होताना दिसत नाही,” अशी भूमिका त्यांनी मांडली.

अजित पवार यांच्यानंतर पक्षाची धुरा आपल्या हातात आली नाही, या कारणामुळे काही नेत्यांकडून अशी भूमिका घेतली जात आहे का, असा सवालही त्यांनी उपस्थित केला. पक्षातील काही ज्येष्ठ नेते स्वतःचं राजकीय स्थान मजबूत करण्याच्या प्रयत्नात आहेत का, यावरही त्यांनी अप्रत्यक्षपणे प्रश्नचिन्ह उपस्थित केलं.

प्रदेशाध्यक्ष बदलाच्या चर्चेला पुन्हा वेग

दरम्यान, प्रशांत किशोर यांनी सुनेत्रा पवार यांना प्रदेशाध्यक्ष बदलण्याचा सल्ला दिल्याची चर्चा सुरू झाली आहे. प्रदेशाध्यक्ष बदलल्याशिवाय आपण त्यांच्यासोबत काम करू शकणार नसल्याचं प्रशांत किशोर यांनी सांगितल्याचा दावा केला जात आहे.

या पार्श्वभूमीवर रुपाली ठोंबरे यांच्या वक्तव्यामुळे राष्ट्रवादी काँग्रेसमधील अंतर्गत राजकारण पुन्हा चर्चेत आलं आहे. प्रदेशाध्यक्ष बदलाचा निर्णय पक्षासाठी किती महत्त्वाचा ठरतो आणि सुनेत्रा पवार याबाबत नेमकी कोणती भूमिका घेतात, याकडे आता राजकीय वर्तुळाचं लक्ष लागलं आहे.

रुपाली ठोंबरे यांच्या दाव्यामुळे राष्ट्रवादी काँग्रेसमधील संघटनात्मक बदलांची चर्चा आणखी तीव्र झाली असून, प्रदेशाध्यक्षपदाबाबत पक्ष नेतृत्व कोणता निर्णय घेणार, हे पाहणं महत्त्वाचं ठरणार आहे.